Die Suid-Afrikaanse Raad op Verpleging

Regulasies Betreffende Rolle vir Ingeskrewe Verpleegsters en Vroedvroue

Die Minister van Gesondheid het, kragtens artikel 11(1) van die Wet op Verpleging, 1957 (Wet 69 van 1957), sy goedkeuring geheg aan die volgende regulasies betreffende rolle wat deur die Suid-Afrikaanse Verpleegstersraad gemaak is ter vervanging van die regulasies gepubliseer by Goewermentskennisgewing R. 956 van 28 Junie 1963, soos gewysig deur Kennisgewings R. 44 van 10 Januarie 1964 en R. 832 van 27 Mei 1966:-

BYLAE

Besonderhede wat op die rolle vir ingeskrewe verpleegsters en vroedvroue aangebring moet word

1.    Die volgende besonderhede moet ten opsigte van elke persoon op die rol aangebring word:-

(a)    Volle name;

(b)    woon adres;

(c)    die jaar van inskrywing;

(d)    die ingeskrewe kwalifikasie en die jaar waarin dit behaal is of dat inskrywing ingevolge artikel 12(1)(c) van die Wet toegestaan is.

Toelating tot die rolle

2. (1) (a)    'n Persoon wat aan die voorgeskrewe vereistes vir inskrywing as 'n ingeskrewe verpleegster/verpleër voldoen het, word ingeskryf met ingang vanaf die datum waarin die voorgeskrewe opleiding voltooi was, of met ingang vanaf die datum waarop die voorgeskrewe eksamen suksesvol afgelê is, welke datum ook al die laaste is.

(b)    'n Sertifikaat van inskrywing word uitgereik in 'n vorm deur die Raad bepaal.

(2) (a)    'n Aansoek om inskrywing van 'n kwalifikasie wat by 'n ander liggaam behaal is, moet in die vorm van Bylae A ingedien word en word vergesel van die volgende (indien 'n dokument in 'n ander taal as Afrikaans, Engels, Vlaams of Nederlands is, moet die oorspronklike vergesel gaan van 'n beëdigde vertaling):-

(i)    Die oorspronklike sertifikaat van kwalifikasie;

(ii)    'n verklaring deur die liggaam wat dit uitgereik het dat die sertifikaat van kwalifikasie nog geldig is;

(iii)    die besonderhede van opleiding en eksamens wat die Raad nodig ag;

(iv)    indien die applikant nie opleiding deur die taalmedium van Afrikaans, Engels, Vlaams of Nederlands deurloop het nie, 'n sertifikaat wat die Raad bevredig dat die kandidaat bedrewe is in die lees, skryf en praat van Afrikaans, Engels, Vlaams of Nederlands. Die bedrewenheid moet sodanig wees dat die applikant instruksies vir die verpleging van pasiënte kan ontvang en gee;

(v)    enige ander inligting waarop die Raad mag besluit;

(vi)    aansoekgelde van driehonderd-agt-en-twintig rand en vyf-en-negentig sent (R328,95), BTW uitgesluit; met dien verstande dat die gelde nie betaabaar is ten opsigte van 'n kwalifikasie wat in die Republiek of die gebied Suidwes-Afrika bekom is nie. Die gelde word nie terugbetaal indien die aansoek teruggetrek of laat vaar word, of wat ook al die uitslag van die aansoek mag wees nie. Die Raad kan bewys van die egtheid en geldigheid van die ingediende dokumente vereis.

[ Die bogenoemde bedrag tree vanaf 17 November 2006 in werking. Die bedrag was voorheen R300,00 gewees, BTW uitgesluit. ]

(b)    Indien 'n aansoek toegestaan word, word die applikant ingeskryf by betaling van gelde van-

(i)    vyf-en-vyftig rand en ses-en-twintig sent (R55,26), BTW uitgesluit, ten opsigte van 'n kwalifikasie wat binne die Republiek verwerf is; en

[ Die bogenoemde bedrag tree vanaf 17 November 2006 in werking. Die bedrag was voorheen R50,00 gewees, BTW uitgesluit. ]

(ii)    tweehonderd-en-negentien rand en dertig sent (R219,30), BTW uitgesluit, ten opsigte van 'n kwalifikasie wat buite die Republiek verwerf is.

[ Die bogenoemde bedrag tree vanaf 17 November 2006 in werking. Die bedrag was voorheen R200,00 gewees, BTW uitgesluit. ]

(c)    'n Sertifikaat van inskrywing word uitgereik in 'n vorm wat die Raad bepaal.

Jaarlikse gelde

3. (1)    'n Ingeskrewe persoon betaal gelde van eenhonderd-nege-en-dertig rand en sewe-en-veertig sent (R139,47), BTW uitgesluit, ten opsigte van elke kalenderjaar: Met dien verstande dat 'n persoon wat die ouderdom van sewentig (70) jaar bereik het, op skriftelike aansoek van betaling van die gelde vrygestel word.

[ Die bogenoemde bedrag tree vanaf 17 November 2006 in werking en is nie van toepassing op jaarlikse gelde ten opsigte van die 2006-kalenderjaar nie. Die bogenoemde bedrag is nie van toepassing nie op jaarlikse gelde ten opsigte van die 2007-kalenderjaar indien die jaarlikse gelde voor 17 November 2006 betaal is. Die bedrag was voorheen R127,19 gewees, BTW uitgesluit. ]

(2)    Van 'n ingeskrewe persoon wat ook as 'n verpleegster of vroedvrou geregistreer is, word nie vereis om die jaarlikse gelde in paragraaf (1) voorgeskryf, te betaal nie.

(3)    Die gelde word betaalbaar op 1 Julie van die jaar voorafgaande aan die jaar waarvoor dit verskuldig is en moet nie later betaal word nie as 31 Maart van die jaar waarvoor dit verskuldig is.

(4)    Die gelde mag nie betaal word voor 1 Julie van die jaar wat die jaar waarvoor dit verskuldig is, voorafgaan nie.

(5)    Die gelde is nie betaalbaar ten opsigte van die kalenderjaar waarin 'n persoon vir die eerste keer ingevolge die Wet ingeskryf word nie.

(6)    'n kwitansie word uitgereik in 'n vorm deur die Raad bepaal.

(7)    Die jaarkikse gelde in subregulasie (1) voorgeskryf, is onderhewig aan 'n jaarlikse verhoging van nie meer nie as die gemiddelde jaarlikse persentasie verandering in die Verbruikersprysindeks (VPI) vir die vorige jaar.

Skrapping uit die rolle

4. (1)    Die naam van 'n persoon word uit die rol geskrap-

(a)    by afsterwe;

(b)    op versoek, met dien verstande dat 'n beëdigde verklaring in 'n vorm wat deur die Raad bepaal word, ingedien word;

(c)    by versuim om die jaarlikse gelde in regulasie 3 voorgeskryf, te betaal. Die datum van skrapping is 1 April van die betrokke jaar;

(d)    indien die persoon ook 'n geregistreerde verpleegster/verpleër of vroedvrou is, by versuim om die jaarlikse gelde vir geregistreerde verpleegsters en vroedvroue te betaal. Die datum van skrapping is 1 April van die betrokke kalenderjaar;

(e)    op 'n besluit van die Raad ingevolge die Wet.

(2)    Die naam van 'n persoon kan uit die rol geskrap word indien 'n kwalifikasie waarop inskrywing ooreenkomstig regulasie 2(2) toegestaan was, deur die owerheid wat dit uitgereik het, ingetrek, gekanselleer of opgeskort word vanweë gedrag wat volgens die Raad se mening onbetaamlik of skandelik is.

Weerinskrywing op die rolle

5. (1)    'n Aansoek om weerinskrywing in 'n vorm wat die Raad bepaal tesame met die jaarlikse gelde vir die lopende kalenderjaar word ingedien, en-

(a)    Indien die applikant se naam ingevolge regulasie 4(1)(b) geskrap was, 'n bedrag van agt-en-vyftig rand en sewe-en-sewentig sent (R58,77), BTW uitgesluit;

[ Die bogenoemde bedrag tree vanaf 17 November 2006 in werking. Die bedrag was voorheen R52,63 gewees, BTW uitgesluit. ]

(b)    indien die applikant se naam om 'n ander rede geskrap was, 'n bedrag van tweehonderd-en-sestien rand en sewe-en-sestig sent (R216,67), BTW uitgesluit; met dien verstande dat die jaarlikse gelde en die gelde nie betaal hoef te word deur 'n persoon wat terselfdertyd om weerinskrywing op die register as 'n verpleegster/verpleër of 'n vroedvrou aansoek doen nie.

[ Die bogenoemde bedrag tree vanaf 17 November 2006 in werking. Die bedrag was voorheen R197,37 gewees, BTW uitgesluit. ]

(2)    'n Sertifikaat van weerinskrywing word uitgereik in 'n vorm deur die Raad bepaal.

Naamsverandering

6.    'n Ingeskrewe persoon moet die Raad spesifiek skriftelik in kennis stel van 'n naamsverandering deur huwelik of ander wetsproses. Die Raad kan dokumentêre of ander bewys van die verandering vereis. In die geval van 'n huwelik, moet die huweliksertifikaat ingedien word. Stukke word terugbesorg.

Verandering van woonadres

7.    'n Ingeskrewe persoon moet die Raad spesifiek skriftelik in kennis stel van 'n verandering van woonadres.

Toepassing op die gebied Suidwes-Afrika

8.    Hierdie regulasies is ook in die gebied van toepassing.

BYLAE A

Hierdie Web weergawe van hierdie regulasies © S A Raad op Verpleging.

Gereproduseer ingevolge die Staatsdrukker se Outeursregsvergunning 7977 van 28 Junie 1983.

U mag vir u eie of vir u organisasie se gebruik afskrifte van hierdie regulasies maak.  U mag vrylik uit hierdie regulasies kwoteer op voorwaarde dat u na die korrekte Goewermentskennisgewingsnommer verwys.  U mag NIE afskrifte van hierdie regulasies verkoop nie.